San Pedro Calungsod ipasunod sa mga batan-on

CEBU, Philippines - Gipahinumduman sa simbahan ang mga batan-on sa pagsunod sa ehemplo ni San Pedro Calungsod atol sa kapistahan kagahapon.

Sa iya’ng wali, gitumong ni Fr. Glad Niere ang mga batan-on bahin sa pagkakatekista, pagkamisyonero ug pagkabatan-on ni San Pedro Calungsod.

Ang mga batan-on kinahanglan kamao motabi ug motudlo sa pulong sa Ginoo, presentable nga magsangyaw ug sama ni San Pedro Calungsod nga batan-on pa nga gipadala sa Guam ug didto giula ang iya’ng kinabuhi alang sa pagsabwag sa pulong sa Diyos.

Matud ni Fr. Niere nga ang kahimtang sa kabatan-onan karon kritikal na kaayo tungod kay daghan na ang mga wala’y pamatasan nga sagad gibasol ngadto sa mga ginikanan nga wala motudlo sa sakto ngadto sa ila’ng mga anak.

Apan matud pa niya nga dili ang mga ginikanan lang ang basulon kun dili sa mga batan-on mismo nga dili gusto makat-on.

Si Dean Sagrado, youth leader ug maestro, niingon nga kinahanglan ang mga ginikanan ug ang mga magtutudlo mag-estoryahay sa kahimtang sa mga anak.

Matud pa ni Sagrado nga taphaw na ang moralidad sa mga batan-on karon tungod sa impluwensiya sa media.

Dugang niya nga kinahanglan nga  monitoron sa mga ginikanan ang ilang mga anak ug matun-an sa maayo’ng pamatasan.  (BANAT NEWS)