“Drug lord” nadakpan sa CIB

CEBU, Philippines – Nasikop ang usa ka gidudahang drug lord sa gihimo nga buy-bust operation sa mga sakop sa City Intelligence Branch sa Cebu City Police Office diha sa Sitio Upper Torre, Barangay Inayawan pasado alas-12 kagahapon sa udto.

Ang dinakpan naila nga si Darwin Tibay, nagpuyo sa maong lugar nga giingong igsuon sa usa ka barangay kagawad sa maong barangay.

Gawas sa mga sakop sa City Intelligence Branch lakip sab nga mitabang sa maong operasyon ang taga Philippine Drug Enforcement Agency (PDEA-7) ug Pardo Police Station.

Ang hepe sa CIB nga si Superintendent Romeo Santander miingon nga usa ka notadong drug personality si Tibay. “Mahulog g’yud siya nga druglord, ilado na kaayo ni siya,”matud pa ni Santander.

Sumala pa ni Santander nga dili lang mga ginagmay nga drug pushers ang kayang dakpon sa kapolisan.

“This is one way of  telling the public nga we are not only after for those level drug pusher, eventually hina+y-hinayan nato to come up with the very high profile drug personality,” sumala pa ni Santander.

Atol sa buy-bust operation sa kapulisan nakapalit ang asset sa kapulisan og usa ka putos sa gituohang drugas nga mikantidad og usa ka libo ka pesos ug human sa pagtunol niya sa shabu gidakop kini dayon.

Apan inay nga minilyon nga shabu ang nasakmit, mokabat sa P70,000 lang nga kantidad sa shabu ang nakuha sa mga operatiba sulod sa balay ni Tibay.

Si Santander mipasabot nga kasagaran sa mga drug lord gagmay ra g’yud kaayo og drugas nga pundo sa ilang mga balay kay igo lang kini magmandar og magpadagan sa ilegal nga negosyo.

Apan sumala pa niya kapin sa usa ka kilo nga shabu ang mabaligya sa suspek matag semana apan dili kini modugay sa balay ni Tibay.

Matud pa ni Santander nga idlas si Tibay tungod kay ilaha unta kining dakpon niadtong Marso 6, 2015 apan nakaikyas.

Una nang nasikop sa kapulisan ang duha ka igsuon niini nga sila si Nelson, 28,  ug Niel Tibay, 18, nga nakuhaan og P20,000 nga kantidad sa gituohang shabu.

Ang suspetado  miangkon nga nalambigit siya sa maong ilegal nga negosyo apan mihunong na siya niini. – /EIM) (BANAT NEWS)