Gikulata’g’ asawa gidapigan sa hepe
CEBU, Philippines - Job order nga nadestino sa Provincial Environmental and Natural Resources Office (PENRO) nga gikulata sa asawa sa milabay’ng semana tungod sa pagdeklarar nga siya biyudo dili mahimong taktakon sa serbisyo tungod sa kadako sa papel niini sa maong buhatan.
Ang maong kawani matud pa usa ka Marine Biologist nga nihit kaayong pangitaon karong panahona matud pa ni Atty. Chad Estella, hepe sa PENRO.
Matud ni Estella nakadawat siya og suwat gikan sa unang asawa sa maong lalaki nga nagkanayon nga walay rason nga patrabahoon ang iyang bana kay wala man kini mosuporta kaniya ug sa ilang duha ka anak.
Si Estella nagkanayon nga duna siya’y nakuhang record nga ang maong kawani dunay petisyon nga gi-grant sa korte kabahin sa “presumptive death” sa una niining asawa ug nakigminyo kini sa laing babaye ngadto sa lungsod sa Argao.
Apan ang ikaduhang asawa sa maong lalaki namatay hinungdan nga nabutang sa record niini diha sa Human Resource Management Office (HRMO) sa Kapitolyo usa na siya ka “biyudo.”
Giingong sulod sa 20 ka tuig na ang maong lalaki ug ang unang asawa niini nga wala nay komunikasyon. Matud ni Estella nagsubay sa balaod ang maong kawani.(Brenda D. Batuto/EIM)(BANAT NEWS)
- Latest
