P1M cash ug alahas gikawat
CEBU, Philippines – Mokabat sa P1 milyon kapin nga salapi ug mga butang ang nahanaw sa usa ka magpapatigayon sa Barangay Cabangcalan, Dakbayan sa Mandaue human gilungkab ang ilang panimalay sa gidudahang mga kawatan.
Si Police Officer 3 Antonio Discaten sa kapolisan sa Presinto 3 sa Mandaue City Police Office (MCPO) miila sa biktima nga mao si Richard Uy, 49, nagpuyo sa maong dapit.
Nakurat na lang ang biktima sa pag-abot niini sa ilaha nianang kaadlawon nga nagkatag na ilang mga gamit.
Sa pagsusi niya sa ilang lawak gilungkab na ang ilang cabinet ug nawala na ang P800 mil nga cash, laptop, lima ka relo de pulso.
Sa pagsusi sa kapolisan, nasuta nga ang mga kawatan nakasulod sa balay pinaagi sa paglungkab sa luyo nga pultahan sa ilang kasilyas. – /EIM) (BANAT NEWS)
- Latest
