Magtiayon gitulis sud sa balay, P300 mil nakuha

CEBU, Philippines - Nabiktima sa wala mailhing mga tulisan ang magtiayong senior citizen  diha mismo sa sud sa ilang balay sa Sitio Purok 5 Lusong sa Barangay Loay sa dakbayan sa Toledo.

Giila ang mga biktima nga sila si Rodolfo Fajardo, 80, ug asawa niini nga si Filomena Fajardo,78, residente sa nahisgutan nga lugar ug naila nga tigpatanto og kwarta.

Sa pakighinabi sa Banat News kang Kapitan Junalyn Alicaba sa maong barangay,  aduna nay nasigpatan nga duha ka nagmotor nga nagbadhas-badhas duol sa panimalay sa mga biktima sayo nianang adlawa.

Giingong namalik kini alas-3:00 sa hapon ug pag-abot sa pasado alas-6:00 sa gabii nahitabo ang krimen.

Nasayran nga kalit nga nisulod ang tulo sa panimalay sa magtiayon ug mideklarar og tulis dayong darok kang Filomena sa sawog.

Dihang nakita ni Rodolfo ang gibuhat sa mga tulisan, nisukol pinaagi sa sundang apan gipusil kini sa usa sa mga tulisan.

Human sa pagpusil daling nisibat ang mga suspetsado dala ang  gibana-bana dul-an sa P300 mil nga cash sa magtiayon. Daling gidala sa tambalanan si Rodolfo nga adunay samad sa iyang dughan samtang luwas ra sa kahimtang ni Filomena.

Walay kauban sa ilang panimalay ang mga biktima sanglit adunay mga trabaho ang mga anak niini. Padayon pang giimbestigahan sa kapulisan sa Toledo ang maong panghitabo. (Raymond Abarcas/EIM)(BANAT NEWS)