Nubain sige pa sa kamagayan
CEBU, Philippines - Nasikop sa City Intelligence Branch ang lima ka tawo lakip sa duha ka babaye atol sa buy-bust operation sa barangay Kamagayan, dakbayan sa Sugbo pasado alas 11 sa nakalabay nga gabii.
Ang hepe sa CIB, Supt. Romeo Santander, niingon nga ilang gihimo ang operasyon nunot sa negosyo sa nubain, milk shake o nubain nga may sagol shabu sa maong lugar.
Giila ang mga nasikop nga sila si Arnel Magto, 44, ulitawo nga mao’y target sa kapolisan, Karhl Philip Alpasa Alix, hingkod nga taga Lahug, Vincent Montealto, Ruby Tria, 36, ug Mitch Paller, 21.
Nakuha gikan ni Magto ang 18 ka ampoules sa nubain ug duha ka medium size sa gituohang drugas samtang ilang nakuha kang Paller ang 74 ka ampoules sa nubain ug P4,300 ug kang Tria ang 22 ka ampoules sa nubain ug sila si Montealto ug Alix nakuhaan og mga drug paraphernalia.
Matud ni Santander nga dili sila makatuo nga may nagbaligya pa ba og nubain sa maong lugar human nademolis ang mga balay sa maong lugar.
“Wala nagtuo nga naa pa na diha kay nahawan na man na’ng lugaraha, barung-barong ra ang ilang mura’g drug den didto, dili ka makatuo nga naa diay nagbaligya og drugas sa lugar,” matud ni Santander.
Sumala pa sa opisyal nga si Magto napugos kini og baligya og drugas aron dunay ikapalit og tambal sa iyang sakit nga diabetes. (BANAT NEWS)
- Latest
