3 ka bata ‘luwas gikan sa sex trafficking

CEBU, Philippines – Naluwas sa kapolisan sa Mandaue City Police Office (MCPO) ang tulo ka batang babaye dihang ilang gironda ang lodging house sa Sitio Mansinitas sa Barangay Tisa, Dakbayan sa Sugbo.

Si  Police Officer 1 Mar Villamonte miila sa dinakpan nga Danish national nga mao si Nicola Jacobsen, 54,  samtang  ang giingong bugaw nga nadakpan mao si Alona Tortosa, 34,  taga Sitio Orel, Barangay Banilad sa Dakbayan sa Mandaue.

Matud pa ni PO1 Villamonte nga usa ka 12- anyos nga batang babaye nga giingong gisuwayan og bugaw sa suspek nga si Tortosa maoy mibutyag bahin sa binuhatan ni Tortosa dihang nangita ang mga ginikanan sa duha ka batang wala na mauli sa ilahang balay.

Nasayran nga ang 12-anyos nga dalagitang misumbong sa kapolisan mibutyag nga niadto pang Disyembre sila gibugaw sa suspek sa maong langyaw.

Ang ilang hepe nga si Police Senior Inspector  Jimmy Portes  mimando sa hepe sa Women’s Section nga si Senior Inspector Mercy Villarojo kalabot sa pagahimuong pagronda sa nahisgotang lodging house.

Gikatahong naabtan sa kapolisan ang duha ka batang babaye nga nagpangidaron og 12- anyos ug 11- anyos nga gikatahong gipahingos sa langyaw og solvent.

Ang kapolisan mihimo pa og lawom nga imbestigasyon sa maong kaso samtang giandam na ang kaso nga kalapasan sa Expanded Anti-Human Trafficking in Person Act batok sa duha ka suspek. – /EIM) (BANAT NEWS)