Siyam sikop, 2 ikyas sa buy-bust

CEBU, Philippines - Nasikop sa mga sakop sa City Anti-Illegal Drugs Special Operations Task Group (CAIDSOTG) ang gidudaha’ng level 3 drug pusher sa sitio Tapuko, Pit-os, dakbayan sa Sugbo niadtong nakalabay nga hapon.

Ang nasikop naila nga si Neil Gerona, 28, ulitawo ug nagpuyo sa maong lugar.

Matud ni Sr. Insp. Eunil Avergonzado, hepe sa CAIDSOTG, nga ilang nasikop si Gerona human napalitan og usa ka gamay nga pakete sa gituohang drugas sa ilang asset.

Nakuha gikan sa suspek ang usa ka medium size ug upat ka gagmay’ng pakete sa gituohang drugas nga mikantidad og halos P50,000 ug ang P700 nga gituohang kinitaan sa suspek.

Samtang gisikop ang duha ka lalaki atol sa buy-bust operation sa sitio Atyo, Colawin, lungsod sa Argao niadtong nakalabay nga hapon.

Ang mga nasikop naila nga sila si Fortun Abear, 58, ug Jesus Potestas, 24.

Gipangulohan sa hepe sa lungsod sa Argao, Sr. Insp. Alejandro Batobalonos, ang operasyon diin nakuha gikan ni Abear ang 10 ka pakete sa gituohang drugas.

Sa managlahing buy-bust operation sa Lapu-Lapu City Police Office -City Intelligence Branch, upat ka lalaki ug usa ka babaye ang nasikop samtang ang kauban niikyas sa sitio Balanghoy, barangay Gun-ob.

Si Police Senior Inspector Rogelio Bayona, hepe sa CIB, nagkanayun nga ilang nadakpan si Jocelyn Paragsa, 29, taga sitio Sangi, barangay Pajo; Rudney Taping, 32, taga sitio Humay-Humay; Armand Pinote, 32, taga sitio Balanghoy.

Laing nasikop nga mga kauban mao si Reynaldo Lumar, taga Purok Kangkong kinsa naaktohan nga nagsuyop kuyog si Dennis Oyao, 32, taga barangay Marigondon apan nakaikyas.

Nakuhaan og lima ka gagmay’ng pakete sa shabu ug duha ka tag P100 si Taping samtang upat ka medium size nga pakete sa shabu nakuha gikan ni Pinote, usa ka .22 magnum revolver ug unom ka buhing bala.

Upat ka gagmay’ng pakete sab sa shabu ang nakuha gikan ni Paragsa ug duha ka gagmay’ng pakete sa ginadiling drugas ang nakuha gikan ni Lumar.

Narekober ang usa ka motor nga may plate number 5835 IQ nga gipanag-iya ni Oyao.

Sa laing bahin, nikabat sa P62, 540 ang nasakmit nga ilegal nga drugas gikan sa duha ka babaye ug usa ka lalaki sa buy-bust operation sa sitio Kinalunsan sa niagi pa’ng Lunes sa gabii.

Ang mga suspek mao sila si Dominica Potot, 50; Sarah Jane Libaton, 27, ug Baby Berdin kinsa nailhan sa pangan nga Carding.

Si Potot ug Berdin taga sitio Kinalumsan samtang si Libaton taga sitio Kapayas. Nakuha ang usa ka gamay’ng pakete sa shabu gikan ni Berdin, laing lima gikan ni Potot ug usa ka gamay’ng pakete sa ginadiling drugas ang nakuha kang Libaton.

Apan niadto’ng gabhiona, dali’ng nakaikyas si Berdin dala ang marked money nga P500 ug gagmay’ng pakete.  (BANAT NEWS)