Toledo nanginahanglan og dugang bomber

CEBU, Philippines – Ang kadagkoan sa Bureau of Fire Protection (BFP) sa dakbayan sa Toledo miawhag karon sa ilang rehiyonal nga buhatan nga dugangan sila og bombero karong tuiga.

Si SFO2 Julius Dagatan nga maoy tigpamaba sa kabomberohan sa Toledo mibutyag nga 19 ra sila ka bombero nga nadistino sa mao nga dakbayan sa kasadpang siyudad sa Sugbo. Matud ni SFO2 Dagatan nga nakapadala na sila og suwat-hangyo sa BFP-7 regional office ug sa kagamhanang lokal sa Toledo aron madugangan sila og mga kawani bisan og drayber nga momaneho sa firetruck. Ang Toledo Fire Station adunay sub-station nga gibutang sa Barangay Don Andres Soriano (DAS) nga gitumong aron dali ra kini nga makaresponde kun may sunog nga moulbo sa mao nga dapit.

Karon lang buwana duha na ka alarma sa sunog ang natubag sa kabomberohan sa Toledo nga naglakip sa pag-ulbo sa baga’ng aso sa Toledo City Public Market ug sa sunog sulod sa compound sa Atlas Fertilizer sa Barangay Sangi. – /RUB) (BANAT NEWS)