Upat nadakpan sa drugas
CEBU, Philippines - Upat ka lalaki ang nangasikop sa managlahi’ng anti-illegal drug operations sa dakbayan ug lalawigan sa Sugbo. Nasikop sa kapolisan sa dakbayan sa Bogo ang usa ka Dondon Tuñacao, 22, gituohang drug pusher nga nalakip sa ilang watchlist pasado alas 6:00 sa niaging gabii sa barangay Gairan.
Usa ka polis ang nipalit sa suspek og usa ka gamay nga pakete nga shabu nga mobalor og P200 dayun gisikop sa kapolisan.
Dihang girekisa ang suspek nakuhaan pa gyud og duha ka gamay nga pakete nga shabu ug P300 nga salapi’ng gituohang kinitaan sa pagpamaligya og shabu ug ang iyang motorsiklo.
Samtang gibalhug sa bilanggoan ang tulo ka lalaki nga naatlan sa mga nagpatrolya nga polis nga nagdala og drugas pasado alas dos kagahapon sa kadlawon sa Parian, dakbayan sa Sugbo.
Ang nasikop naila nga sila si Helwood Timtim, 21, taga-Kimba, Talisay City; Christian Lagarde, 30, taga-Day-as, Cebu City ug si Jason Bul-og, 23, taga-Carreta, Cebu City.
Naatlan sa mga nag-roving nga polis nga naghupot og drugas ang tulo samtang nagtapok-tapok sa maong dapit hinungdan nga dali silang gisikop sa kapolisan.
Nakuha gikan kanila ang tulo ka gagmay nga pakete sa gituohang shabu ug gidala sa Parian Police Station aron pasakaan og kasong kalapasan sa Comprehensive Dangerous Drugs Act of 2002. (BANAT NEWS)
- Latest
