170 mil bag-ong narehistro sa Mandaue

CEBU, Philippines – Kapin sa 170 mil na ka bag-ong botante ang nakaparehistro sa buhatan sa Commission on Elections sa dakbayan sa Mandaue sukad niadtong Hulyo 1, 2O13. Kini gilauman nga mosaka pa ang gidaghanon hangtud sa katapusang bahin sa pagpangrehistro karong Oktobre 2015.

Si Jackie Reuyan, assistant election officer sa dakbayan, miingon nga ang maong gidaghanon sa ilang pagrehistro ilang natala hangtud sa katapusang adlaw nila’ng pagpangrehistro niadtong Disyembre 21.

Matud ni Reuyan nga mobalik sa pagpangrehistro ang ilang buhatan karong Enero 5 ug magpadayun gihapon ang ilang naandan nga satellite registration sa matag adlaw nga Domingo sa kabarangayan.

Si Reuyan miingon nga sa mga adlaw nga Lunes ngadto sa Biyernes maoy ilang marehistro ang 200 ka bag-ong botante ug mosaka pa ngadto sa 300 ang gidaghanon sa mga adlaw nga Domingo.

Gitataw ni Reuyan nga ang satellite registration sa kabarangayan ilang gipasiugdahan ubos sa koordinasyon sa barangay kapitan sa lugar nga hingtungdan sa paghatag og kasayun sa mga molupyo sa pagparehistro nga dili makahigayun sa laing mga adlaw tungod sa kakulian sa trabaho ug uban pa nga mga hinungdan niini.

Dugang pa ni Reuyan nga nag-agad sila sa pagtakda sa adlaw nga Domingo sa matag barangay kapitan sanglit sila man usab ang moandam sa lugar ug mao usab ang mopahibawo sa mga molupyo sa nahisgutang kalihukan. (BANAT NEWS)