Abellanosa magpabilin sa pwesto

CEBU, Philippines -  Si Kongresista Rodrigo “Bebot” Abellanosa sa Cebu City south district miingon nga mapupos na lang ang iyang termino dili pa hingpit nga mapatuman ang kamandoan sa Office of the Ombudsman pagpataktak kaniya sa katungdanan.

Matud ni Abellanosa nga nakapasaka na siya og Motion for Reconsideration ug nag-awhag ni Ombudsman Conchita Carpio Morales nga bakwion ang hukom nga nagdeklarar kaniya nga sad-an sa kaso nga graft and corruption.

Ang Ombudsman nakakuha og igo nga basihanan nga si Abellanosa sad-an sa kaso nga gipasaka sa usa ka Philip Banguiran tungod sa pagtugot nga ang iyang tunghaan nga mao ang Asian College of Technology (ACT) malakip sa makabenepisyo sa Cebu City College Scholarship Program.

Gisuportahan sa Ombudsman ang baruganan ni Banguiran nga si Abellanosa sad-an sa graft and corruption tungod kay konsehal pa kini kaniadto sa dakbayan sa Sugbo diha nga mitugot siya nga ang ACT malakip sa mga tunghaan nga makadawat og scholars ug naka-income og minilyon ka pesos.

Base sa reklamo ni Banguiran nga gisumiter sa Ombudsman nagkanayon nga ang ACT maoy labing daghan og mga tinun-an nga scholars sa dakbayan ug hinungdan nga nakabenepisyo kini sa scholarship program.

Apan lahi hinuon ang baruganan ni Abellanosa kinsa miingon nga pamolitika ang gihimo ni Banguiran kay dumadapig kini sa iyang kontra sa pagka kongresista kaniadto nga si Atty. Aristotle Batuhan.

Matud ni Abellanosa nga maisip pa gani nga pagtabang ra ang iyang gihimo tungod kay aron dili na makabayad og dugang tuition fees ang mga tinun-an, gitumbasan niya og P10 mil ang gihatag nga P10 mil nga scholarship grant sa matag tinun-an.

Si Abellanosa miingon nga paabton niya sa Korte Suprema kini nga kaso kun ang iyang Motion for Reconsideration dili paminawon sa Ombudsman. (BANAT NEWS)