Duha nakuryentihan, usa patay

CEBU, Philippines – Patay ang 46-anyos nga lalaki human nakuryentihi samtang nag-ayo sa atop sa balay sa Barangay 2, lungsod sa Tuburan sa niaging adlaw.

Giila ang namatay nga si Mario Dilao, taga Barangay Caridad, sa maong lungsod.

Matud ni PO1 Leliano Pepito nga igo lang gisugo si Dilao ni Felixberto Gabuya sa pagpaayo sa atop sa iyang balay.

Sumala pa ni Pepito nga naka-ibot na og pipila ka atop sa balay si Dilao dihang kalit lang nikirig didto sa atop nga iyang gitungtungan.

Dali pa unta nga gidala sa tambalanan si Dilao apan nakabsan gyud sa iyang kinabuhi gumikan sa naangkon nga mga paso sa kalawasan ug sa ulo niini.

Usa ka service drop wire ang nidikit sa atop sa balay nga mao’y gituohang nakapakuryenti patay ni Dilao. “Wala man mi lain nakita sa lugar sir, kadto ra gyu’ng service drop wire nga mitapad sa atop, kay dili pud to agi sa mainline sa CEBECO kay layo ra man kaayo to sa atop sa taas,” matud ni Pepito.

Hinuon gitug-an ni Pepito nga wala na lang sab mopasaka og kaso ang pamilya sa namatay human sa sabotsabot nga nahitabo.

Samtang sa lungsod sa Balamban naangol ang usa ka babaye sa dihang aksidente niini’ng nasaghiran ang linya sa Cebu Electric Cooperative (CEBECO) dihang nag-ayo kini sa antenna sa iyang telebisyon nga gitungtong sa kawayan sa sitio Lumboy, barangay Abucayan. Ang biktima naila nga si Aida Marcellones, hingkod ug nagpuyo sa maong lugar.

Matud ni PO1 Mark Gorres sa Balamban Police nga kalit lang natumba ang kawayan ug didto mitugpa sa live wire sa CEBECO hinungdan nga nakuryentihan ug nalagpot sa sementado nga nataran si Marcellones. Nakaangkon og mga paso sa kalawasan ang biktima ug bun-og sa ulo ug dali nga gidala sa Balamban District Hospital. – /GMR) (BANAT NEWS)