Repacking sa relief packs magpadayon

CEBU, Philippines - Molungtad pa og laing duha ka semana ang repacking operations sa mga family food packs sa mga kawani sa Department of Social Welfare and Development (DSWD-7) ug sa mga volunteers alang sa mga biktima sa bagyong Ruby sa Eastern Visayas.

Ang DSWD-7 nahimo na nga repacking center sa mga relief supplies alang sa mga lugar nga gikuso-kuso sa bagyong Ruby sa Eastern Visayas.

Liboan ka mga sinakong bugas, kinahon nga mga noodles, canned goods ug bottled water ang anaa karon sa tulo ka warehouse sa DSWD.

Apan ang warehouse nga nahimutang sa CICC mao gyud ang repacking center samtang ang laing duha ka bodega maoy butanganan sa mga dinaliang panginahanglan sa Central Visayas kun may kalamidad.

Gitug-an ni Rizalina Patindol ang warehouse in-charge sa CICC nga tungod sa kadaghan nga kinahanglan i-repack posibleng molungtad pa og laing duha ka semana ang himuong pagpamutos.

Tungod sa kadaghang i-repack padayon sila nga nanawagan og mga volunteers. Ang pagbahig sa food packs gihimo 24- oras diin magpuli-puli ang mga kawani sa DSWD, militar ug mga volunteers.

Ang mga volunteers libre og pagkaon gikan sa pamahaw hangtud na sa panihapon nga gisuplay usab sa mga nagkadaiyang kan-anan sa Sugbo.  (BANAT NEWS)