Mga tunghaan sa Toledo may wifi

CEBU, Philippines - Gihangop sa kadagkoan sa Department of Education-Toledo City Division ang pagbutang og public wifi sa mga tunghaan. Si Toledo City schools district superintendent, Dr. Ronald Gutay, miingon nga ang maong lakang makahatag og tabang labi na nga adunay local area networking sa internet sa mga tunghaan. Hinuon gihimug-atan sa opisyal nga hugot nga idili sa mga magtutudlo ang paggamit sa ilang mga kahimanan sama sa laptop ug cellphone nga adunay wifi alang sa personal nga katuyoan.

Idili usab nga makaduwa og online games ug pag-access sa social networking site oras sa tingklase.

Plano karon sa kagamhanan ang paggahin og dakung pundo gikan sa nasudnong panudlanan alang sa public wifi sa mga pangpublikong lugar sama sa tunghaan, mga buhatan sa gobiyerno ug uban pa. (BANAT NEWS)