Nakigpinusilay sa tulisan

CEBU, Philippines - Naangol ang usa ka 43-anyos nga magpapatigayon diha nga nakigpinusilay siya sa tulisan nga mitulis kaniya ug sa iyang asawa didto sa Sitio San Miguel sa Barangay Pung-ol Sibugay kaniadto’ng Martes sa gabii.

Si Paulino Pezalbon, minyo, ug lumolupyo sa Barangay Cansaga, Consolacion nahiagom og pinusilan sa iyang bitiis diha nga gipusil siya sa tulisan nga midala sa iyang P49 mil.

Matud ni Chief Insp. David Señor, hepe sa Theft and Robbery Section (TRS) sa Cebu City Police Office (CCPO), nga ang biktima sakay kini sa iyang kotse uban sa iyang asawa.

Gikan pa sila sa Balamban nga nangolekta sa kinitaan sa ilang mga bakeshop diha nga nabantayan nila nga adunay nagsunod-sunod kanila nga tawo’ng nagsakay’g motorsiklo didto sa transcentral highway. Pag-abot nila sa Sitio San Miguel mihunong ang mga biktima aron motuman sa sugo sa lawas diha nga kalit lang miabot ang motorsiklo nga gisakyan sa duha ka tulisan ug mition kanila og armas. Human nakuha sa tulisan ang P49 mil ug paingon na nga mosibat, abtik nga gikuha ni Pezalbon ang iyang lisensiyado nga .45 caliber nga pistola ug gipamusil ang mga tulisan. Usa sa mga tulisan ang abtik nga mibalos pagpusil kang Pezalbon ug naigo ang bitiis sa biktima. Nagtuo ang kapolisan nga posible’ng taga Balamban ang duha ka tulisan ug gisundan lang ang magtiayon ug nangita lang kini og higayon nga makapanulis.

Iyang gihulagway nga mga niwang ug batan-on pa ang duha ka tulisan nga wala man gani nagtaptap sa ilang nawong. Samtang gipangita sa kapolisan ang kanhi binilanggo human sa gihimo nga pagpanulis sa menor de-edad nga iyang silingan didto sa Sitio Lawis, Barangay Jugan, Consolacion sa miagi gihapong gabii.

Si PO1 Socrates Borinaga miingon nga gipangita nila karon si Rayland Ybale Sanchez nga nagpuyo sa maong dapit ug kanhi binilanggo sa kaso nga pagpangawat ug paghupot og ilegal nga drugas.  (BANAT NEWS)