Sikyu nga way armas gipusil patay
CEBU, Philippines – Patay ang usa ka guwardiya human kini gipusil sa ulo sa usa ka lalaki samtang kini nagbantay sa usa ka tindahan diha sa dalan Manalili Ermita, Cebu City. Ang biktima giila nga Janilon Sagaral, 34, taga Camputhaw ning dakbayan sa Sugbo.
Matud pa ni Senior Police Officer 4 Rey Cuyos ang imbestigador sa Homicide Section sa Cebu City Police Office (CCPO), nagbarog ang guwardiya sa lugar kalit lang mihunong ang usa ka motorsiklo ug mikanaog ang usa ka lalaki ug mipusil sa biktima. Sigun pa ni Cuyos nga wala’y armas ang maong guwardiya kay sumala pa sa supervisor niini gipa-renew pa ang lisensiya niini. Usa sa gitan-aw karon sa kapulisan ang nakuha nila nga impormasyon nga duna’y nakabikil ang biktima sa maong lugar nga padayon pa sab nga ilang gisubay.
Apan sa nakuha nga impormasyon sa Banat News nga ubay-ubay na nga mga snatchers sa maong lugar ang nasikop sa biktima. Sumala pa ni Cuyos nga ang maong anggulo apil sab nga ilang imbestigahon. Gidala sa Cebu City Medical Center (CCMC) ang biktima apan patay na kini. Human sa hitabo dali sab nga misakay sa usa ka motorsiklo ang gunman ug sibat sa wala masayri nga direksyon. – /EIM) (BANAT NEWS)
- Latest
