Mga skolar dunay tambag

CEBU, Philippines - Ang 89 ka skolar sa Ramon Aboitiz Foundation Inc. (RAFI) mihimo’g pagtuon kun unsaon nga malikayan ang trahedya sa katawhan panahon nga adunay magsingabot nga katalagman.

Atol sa gipahigayong conference sa mga skolar didto sa RAFI-Development Studies Center kagahapon, ang mga skolar miingon nga angay’ng mobiya dayon ang katawhan sa dapit nga ilang nahimutangan ug dili na maghuwat pa nga moabot ang katalagman aron malikayan ang disgrasya.

Si Alvin Santillana sa Local Disaster Risk-Reduction Management Office (LDRRMO) mikonpirmar nga daghang pamilya ang dili dayon mobiya sa ilang kabalayan bisan og kini nalunopan na sa tubig atol nga adunay kusog nga uwan.  Ang tema sa conference nga gipahigayon sa mga skolar mao ang “Urban Development: Disaster Risk Reduction Management-Climate Change Adaptation.”

Ang mga skolar personal nga mihimo’g walo ka buwan nga pakisusi sa lainlaing dakbayan, kalungsoran ug mga barangay dinhi sa Metro Cebu isip kabahin sa ilang pagtuon aron makakuha sila og tukma nga kasayuran.

Apil sa ilang mga sugyot mao nga ang matag pamilya kinahanglan nga magbaton gayud og “first aid kit” nga hitsas sa mga tambal nga magamit dayon atol sa mga emerhensiya sama sa sunog, lunop, tsunami, linog ug uban pa.

Ang kadagkoan sa Department of the Interior and Local Government (DILG) mimando g’yud sa mga opisyal sa kabarangayan nga magmugna og Barangay Disaster Brigades apan daghan ang wala motuman. Mitambong atol sa conference isip panelists mao sila si Carlos Aboitiz, project development manager; Baltazar Tribulano sa Cebu Provincial Disaster Risk-Reduction Management; Lorna Manila, division chief sa NEDA ug uban pa.  (BANAT NEWS)