Motor vs Army truck usa patay

CEBU, Philippines - Patay ang usa ka drayber sa motorsiklo human kini napasok sa usa ka military truck diha sa national highway sa Malingin, sa lungsod sa Daanbantayan.

Ang namatay naila nga si Celso Aguipo, 52, taga Proper Calape, Daanbantayan.

Samtang ang drayber sa military truck naila nga si Staff Sergeant Jun Moncenilla, 46, nadestino sa 5th Special Forces sa Philippine Army nga nakabase sa Barangay Nangka, Balamban.

Matud pa ni Police Officer 3 Alex Ricarte sa Daanbantayan Police nga samtang nagdagan ang duha ka sakyanan sa managlahi nga direksiyon kalit lang mi-overtake ang biktima sa gisundan niining sakyanan apan wala kini makabantay nga diha sa pikas lane nagpadung usab ang maong military truck. Ang military truck nagkarga kini og mga donasyon nga mga school supply gikan sa dakbayan sa Sugbo ngadto unta sa maong lungsod.

Tungod sa grabeng naangkon nga grabeng kadaot sa kalawasan, nakabsan sa kinabuhi si Aguipo.

Gipasabot ni Ricarte nga ila pa nga paabuton hangtod karong adlawa kung mopasaka ba og kaso ang pamilya sa namatay.

Ang commanding officer sa maong sundalo gikatahong mibisita na sa pamilya sa biktima. (BANAT NEWS)