Kanhi OFW napalgang patay

CEBU, Philippines - Napalgan na lang nga patay ug may dakong samad sa likod nga bahin sa iyang ulo ang usa ka babaye nga kanhi Overseas Filipino Worker pasado alas-8 kagahapon sa buntag sa Vista Villa, Barangay Basak sa dakbayan sa Lapu-Lapu.

Ang biktima naila nga si Elsa Paglinawan, 53, molupyo sa maong dapit samtang wala pa mailhi kung kinsa ang responsable sa maong krimen.

Sumala pa ni Police Officer 2 Joseph Cutanda sa Homicide Section sa pakighinabi sa Banat News, base sa imbestigasyon sa iyang kaubanan nga ang biktima nadiskobrehan na lang nga patay na sa ilang kusina.

Napalgan kini nga nag-ubo ug may dako nga samad sa iyang ulo nga gituohang maoy hinungdan sa kamatayon niini.

Matud pa ni Cutanda nga base sa pakisusi sa iyang mga kauban nga nakay-ag na ang mga gamit sa biktima.Wa pa matino kun dunay nangawala sa iyang mga butang.

Duna nay giimbestigar ang kapolisan kalabot sa kamatayon sa maong babaye ug matud pa sa pagkakaron dili pa makasulti ang kapolisan kung tulis ba g’yud ang motibo sa mga kriminal sa pagpatay kang Paglinawan.  (BANAT NEWS)