2 technicians gipatay

CEBU, Philippines - Duha ka cellphone technicians ang gitusaktusak sa bala sa duha ‘sab ka mga wa mailhing lalaki kagahapon sa kaadlawon diha sa eskina Colon ug Climaco Streets sa Barangay Pahina Central ning dakbayan sa Sugbo.

Ang mga biktima naila nga si Ernesto Estrera, 29, ug ang kauban niini nga wala pa mailhi hangtud ning pagbalita.

Matud pa ni Senior Police Officer 1 Ruth Violango sa Homicide Section sa Cebu City Police Office nga nahinabi sa Banat News kini nagkanayon nga sa gidaghanon sa basiyo sa bala ug sa igo sa duha ka biktima duna gayo’y dakong kasuko ang mibuhat sa maong krimen. Nasayran nga samtang naglakaw ang duha ka biktima sa maong lugar kalit lang miabot ang usa ka motorsiklo nga dunay sakay nga duha ka lalaki ug dayon gipusil si Estrera.

Ang kauban niini dali unta nga midagan apan gigukod pa sa mga gunman ug gipusil. Pito ka samad pinusilan ang naangkon ni Estrera samtang tulo ‘sab ka igo ang naangkon sa iyang kauban nga duna pa’y samad pinusilan sa ulo.

“Og kinsa man ang nagbuhat ani duna g’yuy dakong kasuko, wa g’yuy plano nga buhion pa ni sila,” matud pa ni Violango. Nakuha sa kapulisan ang napulo ka mga basiyo sa bala sa wala pa matino nga kalibre sa armas ug tulo ka deformed slugs.

Duna say nakuha nga replica sa pistola mga imbestigador gikan sa bag ni Estrera nga gidudahan sa kapulisan gigamit niini sa mga binuang.

Usa sa pagduda ni Violango nga posibleng duna’y gibinuangan nga kustomer ang duha ka technician, apan wala sab gipadaplin sa kapulisan nga dunay nakaaway ang duha mao nga sila gibawsan.

Sa pagsubay sa kapulisan sa lugar, nagtuo siyang dunay nakakita sa duha ka gunman apan posibleng nahadlok lang nga moistorya kanila.

“Ang mga naestorya namo pulos g’yud miingon nga nagtalikod g’yud daw sila pagpamusil, pulos wala nakakita,” dugang pa ni Violango.  (BANAT NEWS)