Cebuano nga tinun-an gipatay sa Negros
CEBU, Philippines - Tinun-an sa Siliman University nga taga lungsod sa Moalboal dinhi sa Sugbo gipatay sa duha ka wala pa hiilhi’ng tawo pinaagi sa pagtigbas ug pagdunggab sulod sa iyang gipuy-an didto sa Sibulan, Negros Oriental kagahapon sa kaadlawon.
Si Myra Abrenica Gabato, 25, namatay diha-diha dayon tungod sa daghang mga samad. Ang iyang igsuon nga si Melanie gigapos ug gitaptapan ang baba apan nakamaneho kini sa pag-ikyas.
Ang giabtan nga panimalay sa magsuong Gabato duol ra kaayo sa police station sa Barangay Poblacion. Nakasulod ang mga kriminal pinaagi sa pagbawog sa gagmay’ng puthaw nga barandelya sa bentana samtang maayo’ng pagkahinanok sa magsuon.
Si Melanie wala gayud makatimaan sa dagway sa mga kriminal. Mga polis miresponde dayon apan wala na nila madakpi ang nangikyas nga mga kriminal. Dunay mga fingerprints nga nakuha ang mga imbestigador nga hayan magamit aron mailhan ang mga mipatay ni Myra.
Ang laptop sa mga biktima wala kuhaa sa mga kriminal nga midala lang sa Galaxy Note cellphone. Ang magsuon mipuyo sa mao nga balay kaniadto lang Oktubre 26. (BANAT NEWS)
- Latest
