70-anyos gibunalan sa kawatan
CEBU, Philippines - Grabeng naangol ang usa ka tiguwang babaye nga gibunalan og dos por dos nga kahoy sa wala mailhing kawatan nga iyang nasakpan sud sa ilang balay sa Sitio Cogon, Barangay Poblacion, Lungsod sa Liloan.
Si Senior Police Officer 1 Bryan Batiquen sa Consolacion Police Station miila sa biktima nga mao si Marionila Villamor, 70.
Matud pa ni Batiquen nga padung mogawas sa pultahan ang biktima, apan sa pag-abli niya sa pultahan diha na sa iyang tungod ang kawatan nga nagsige na diay og lugit sa lock niini.
Misinggit pagpangayo og tabang ang biktima apan gihapsan kini og kahoy sa ulo.
Ang 78- anyos nga bana sa biktima nga si Erneo dali nga nakasinggit sa pagpangayo’g tabang sa ilang mga silingan hinungdan nga mitalaw ang kawatan ug mikaratil sa pagdagan. Gisusi pa sa kapolisan kung kinsa ang maong kawatan. (BANAT NEWS)
- Latest
