P40 milyones para Solo Parents

CEBU, Philippines - Gisupak ni Mayor Michael Rama ang paghatag og tag P5 mil nga tinuig nga incentive sa matag Solo Parents dinhi sa dakbayan mao nga wala niya aprobahi ang ordinansa, apan karon iyang gipagahinan og P40 milyones ang maong proyekto.

Ang ordinansa nga gipasar sa konseho sa dakbayan gi-veto ni Mayor Rama apan gi-override sa mga konsehal mao nga hingpit gihapon kini nga nahimo’ng balaod.

Si Rama miingon bisan og wala g’yud unta siya’y gusto sa mao nga ordinansa apan dili na lang ‘sab niya kini supakon ilabi na nga ang konsehal nga misugyot niini alyado na sa Team Rama.

Si Konsehal Gerardo Carillo maoy migama sa ordinansahon nga magpahatag og tabang-salapi ngadto sa mga Solo Parents nga padayong miatiman sa mga gagmay nila’ng anak.

Ang “solo parents” mao kadtong bana ug asawa nga nagbinugtong pag-atiman sa ilang mga anak. (BANAT NEWS)