Nakainom mipusil ug mipatay’g amigo
CEBU, Philippines - Patay ang usa ka lalaki ug naangol ang iyang kauban human sila gipangpusil sa gikalalis niini didto sa Barangay Macaas, Catmon kaniadtong Biyernes sa gabii.
Ang namatay mao si Brian Jacalan, 28, samtang ang naangol giila nga si Ronnie Querobin, 43, molupyo sa nahisgotan’g lugar. Ang gitumbok nga mipusil kanila mao si Teodosio Malingin, 35, ila ra’ng silingan.
Si PO2 Vircelito Debulosan, desk officer sa Catmon Police Station miingon nga ang suspek ug ang namatay gikan nga nanigbakay sa Barangay Catmon-Daan.
Apan pag-abot nila sa Barangay Macaas nagkalalis ang duha kabahin sa kuwarta. Si Querobin nakabantay nga gitionan ni Malingin og armas si Jacalan nga nagpakiluoy pa gani unta nga dili siya pusilon ug giisa pa ang iyang kamot.
Misuway unta og pakgang si Querobin aron dili pusilon ang ilang kauban apan giapil usab siya’g pusil ug naigo sa wala nga bukton.
Dali nga gidala sa Juan Dosado Memorial Hospital ang samaran nga si Jacalan apan gideklarar sa mga doktor nga patay na. Si Querobin gidala sa usa ka tambalanan sa dakbayan sa Sugbo.
Ang suspek misuway unta’g sibat sakay sa usa ka mini bus apan ang kapolisan dali nga napahibalo nga ang nagpusil ni Jacalan nagsul-ob og pula nga T-shirt mao nga nadakpan si Malingin.
Nakuhaan si Malingin og kalibre .45 nga pistola nga may mga bala sulod sa iyang magazine. Matud sa polis nga nakainom ang suspek atol sa iyang pagkasikop. - /RUB (BANAT NEWS)
- Latest
