Polis nga nakapusil sa igsuon wa ikiha
CEBU, Philippines - Polis nga aksidenteng nakapusil sa iyang manghod niadtong Martes sa buntag diha sa Barangay Guadalupe ning dakbayan sa Sugbo hayan mabuhian kung walay mopasaka kaniya og kaso.
Ang Homicide Section sa Cebu City Police Office nagpaabot pa sa biktima nga si John Rey Celestial human napusilan sa igsuong si Police Officer 1 Lemuel Celestial.
Matud pa ni Senior Police Officer 1 Ruth Violango sa Homicide Section ang inahan sa managsuon mipadayag nga dili kini interesadong mokiha sa iyang anak.
Apan gipasabot ni Violango nga kinahanglan nga mismo ang biktimang si John Rey maoy modesisyon.
Sumala pa ni Violango nga nakuha na ang bala nga miungot sa liog sa biktima nga padayon pa nga gi-obserbaran sa mga doktor sulod sa pribadong tambalanan.
Sigun pa ni Violango nga kung moabot man ang reglementary period sila na lang maoy mopasaka sa kaso, apan inay nga frustrated homicide, physical injuries lang ang ilang mapasaka batok sa maong pulis.
Nasayran nga napusilan ni PO1 Celestial ang iyang manghod human matud pa misulay kini og ilog sa iyang service firearm dihang gisuna ang biktima tungod sa padayong pagkalambigit niini sa illegal drugs. (BANAT NEWS)
- Latest
