Duha sikop sa armas, shabu
CEBU, Philippines - Nasakmit sa kapolisan ang armas ug shabu sa managlahing oras sa lungsod sa Liloan ug dakbayan sa Danao nga miresulta usab sa pagkasikop sa duha ka tawo.
Usa ka Roland Gairanon Gitgano, 33-anyos nga taga Zone Kamunggay, Paknaan, dakbayan sa Mandaue ang nasikop alas 6 niadtong Huwebes sa gabii sa Poblacion, Liloan atol sa buy-bust operation nga gipangulohan ni Senior Inspector Ramil Morpos.
Nakuha gikan sa suspek ang tulo ka paketeng shabu, P200 nga marked money ug usa ka plastic container.
Samtang sa Poblacion, dakbayan sa Danao, usa ka Allan Capuyan Alerta, 45-anyos nga nagpuyo sa maong dapit ang nasakmitan usab og kalibre .38 nga puno sa bala.
Matud ni PO2 Nelson Pantoja sa Danao Police Station nga nagpakabanang molupyo sa maong dapit ang nitaho labot sa usa ka tawo nga nagsuroy-suroy nga nagpagawal sa gidalang armas.
Si PO3 Feil Restauro ug kaubanan ang daling nakatubag sa alarma hinungdan sa pagkasakmit ug pagkasikop sa suspek.
Ang duha ka dinakpan ang pasakaan sa tagsatagsa ka tukmang kaso ug kasamtangang nagtingkagol sa selda sa kapolisan. (Romeo T. Limpangog/GMR)(BANAT NEWS)
- Latest
