Siyam ka buwang masuso naigo sa saag nga bala
CEBU, Philippines - Ang kapulisan sa siyudad sa Talisay padayon pa sa ilang gihimong imbestigasyon kun kinsa ang nagpabuto og armas nga nakaangol sa usa ka siyam pa ka buwan nga batang lalaki nga naigo sa tuhod.
Ang insidente nahitabo sa Sitio Kabayuan, Barangay San Roque diin usa ka Gian Lhander Jubay, ang nalandig sa tambalanan human maigo sa saag nga bala.
Ang biktima natulog uban sa iyang inahan ug kalit nga mitiyabaw ug sa pagsusi sa inahan nagkadugo na ang tuhod sa bata ug dunay samad pinusilan. Daling gidala sa Vicente Sotto Memorial Medical Center ang bata ug hangtod karon wala pa kagawas sa ospital.
Sa imbestigasyon sa kapulisan, dunay nakitang buslot sa atop sa balay sa mga Jubay.
Matud ni Superintendent Reycel Carmelo Dayon, ang hepe sa Talisay City Police walay nakabantay kun kinsay nagpabuto.
Ang nakuhang slug duol sa bata ipaubos sa ballistic exam aron matino kun unsang klase sa armas ang nakaigo sa bata. (BANAT NEWS)
- Latest