Sikyu giselosan sa laing sikyu gipatay
CEBU, Philippines - Usa ka bala ang mitapos sa kinabuhi sa usa ka 27- anyos nga guwardiya human kini gipusil sa iyang silingan nga usa usab ka guwardiya diha sa guardhouse sa Country Homes, sa R. Duterte Street, Banawa ning dakbayan sa Sugbo. Ang biktima naila nga si Roel Gigante Arsolon, lumad nga taga Kinatarcan, Santa Fe, Bantayan. Samtang ang suspek naila nga si Charlito Llanto, 30, taga Magsaysay Street, Pasil , Cebu City.
Ang pagpamusil gikatahong nahitabo atubangan sa kapuyo sa suspek Eunela Romero, 29, nga gwardiya usab ug kauban sa biktima atol sa pagkahitabo.
Matud pa ni SPO1 Ruth Violango sa Homicide Section sa Cebu City Police Office nga nahinabi sa Banat News, selos ang motibo sa krimen.
Sumala pa ni Violango nga ang suspek nga si Llanto nagduda nga dunay relasyon si Romero ug Arsolon.
Si Llanto nadestino sa usa ka remittance center tapad sa guardhouse sa maong lugar ug sa dihang morelibo na unta si Romero ni Arsolon kalit lang naabot ang suspek ug miingon nga “sakpan g’yud mo!” ug diha dayon gipusil niini sa dughan ang biktima.
Dali nga gidala sa Cebu City Medical Center ang biktima apan nakabsan kini sa iyang kinabuhi. Samtang dali sab nga misibat ang suspek ug padayon pa nga gipangita sa kapulisan.
Si Romero mitug-an sa kapolisan nga grabe g’yud kaseloso si Llanto. (BANAT NEWS)
- Latest
