Nag-away sa pwesto tindero giluba

CEBU, Philippines - Tungod lang sa away sa pwesto nga ilang baligyaan og lemonsito, patay ang usa ka 38-anyos nga lalaki human giluba sa iyang kaubang sidewalk vendor sa may Osmeña Boulevard, Kalubihan, dakbayan sa Sugbo.

Ang biktima naila nga si Reynaldo Tanoco, ulitawo, kasamtangang nagpuyo sa Freedom Park, Ermita ug lumad nga taga Napo, dakbayan sa Carcar.

Suspek sa maong krimen naila lang sa pangan nga si Brad, hingkod ug wala nasayri ang pinuy-anan.

Sumala pa ni PO1 John Erick Samosa sa homicide section sa Cebu City Police Office nga nasuko si alyas Brad human matud pa giilogan og pwesto sa biktima.

Gamit ang pito ka pulgadas nga kutsilyo maoy gihansak niini sa liog ni Tanoco.

Dali pa untang gidala sa Cebu City Medical Center (CCMC) ang biktima apan gumikan sa fatal nga igo sa liog, nakabsan gyud kini sa iyang kinabuhi.

Nagtuo ang kapolisan nga posibleng gawas sa away sa pwesto lagmit ang panag-ilog sab sa kostumer ang hinungdan sa krimen.

Padayon pa nga gipangita sa kapolisan si alyas Brad nga dali sab nga misibat human sa hitabo. (BANAT NEWS)