Tablet gipailisan og shabu, duha sikop

CEBU, Philippines – Kinawat nga Tablet ang gipabayloan og shabu sa duha ka lalaki kinsa nadakpan sa kapolisan sa dakbayan sa Mandaue.

Si PO1 Melvin Pelayo sa Presinto 5 sa Mandaue City Police Office miila sa mga suspek nga sila si John Obligado, 22-anyos nga taga Purok Santan, barangay Opao ug Federico Bate, 42-anyos nga taga Purok Tambis, barangay Umapad, sa maong dakbayan. Matud ni Pelayo nga si Obligado maoy suspek sa pagkawat sa Tablet nga gipanag-iya ni Floramia Roble, 20, taga dakbayan sa Danao ug kasatangang nagpuyo sa Umapad.

Human madakpi si Obligado, kini mitug-an nga ang maong butang sa biktima iyang gipailisan og shabu sa kantidad nga P900 kang Bate.

Kini ang hinungdan nga mihimo og follow-up operation ang kapolisan ug girombo ang panimalay ni Bate sa Purok Tambis, Umapad diin ilang nakuha og balik ang butang sa biktima.

Gihimo usab ang pagrikisa sa kalawasan ni Bate ug nakuha ang duha ka paketeng shabu ug duha ka tin foil nga gidala niini.

Matud ni Pelayo nga si Bate ilang pasakaan og kasong pagpayuhot og ginadiling drugas samtang kasong pagpangawat usab ang ilang ipasaka batok kang Obligado. -/GMR) (BANAT NEWS)