Bag-ong hepe ipaubos sa training

CEBU, Philippines -  Moagi na sa performance governance system sa dili pa mulingkod ang bag-ong hepe sa usa ka police station.

Kini sumala pa ni Atty. Homer Cabaral, regional director sa National Police Commission-7, isip bag-ong kwalipikasyon sa pagka hepe.

Matud ni Cabaral nga importante kaayo nga mapaubos sa maong training ang bag-ong hepe sanglit sila man ang frontliner ngadto sa komunidad.

Kini nagpasabot nga dili lang kutob sa pagpanakop sa dautang elemento ang trabaho sa kapolisan kun dili lakip na usab ang pag-atiman sa reklamo sa katawhan ug pagpalambo sa komunidad.

Matud ni Cabaral nga kinahanglan magpakita ang hepe sa maayong ehemplo ngadto sa iyang mga sakop ug makigtambayayong sa barangay.

Tinguha karon nga magbutang og polis sa matag barangay sa tuig 2016.  (BANAT NEWS)