Nagtaud bombilya naigo sa saag nga bala

CEBU, Philippines - Naigo sa saag nga bala ang usa ka 40-anyos nga lalaki samtang nag-ilis sa bombilya sa fluorescent sulod sa ilang panimalay sa sitio Cambiohan, Poblacion, dakbayan sa Danao niadtong Huwebes sa hapon. Ang naigo sa iyang bitiis mao si Jimmy Salinas, minyo nga nagpuyo sa maong dapit.

Matud ni SPO3 Ildefonzo Prosia nga gitangtang sa biktima ang daan nga fluorescent bulb dihang kalit lang nabati ang lanog nga buto sa armas.

Sa paglabay sa pipila ka gutlo namatikdan na lang sa biktima ang kalit nga pagpamanhod ug nagkadugo na ang tuong bitiis.

Dugang ni Prosia nga dali nga gihatud sa iyang sakop sa pamilya ang biktima sa Danao District Hospital. (Romeo T. Limpangog/GMR)(BANAT NEWS)