14-anyos nadasmagan sa motorsiklo
CEBU, Philippines - Naangol ang usa ka minor de edad nga lalaki nga Grade VII nga tinun-an dihang nadasmagan sa motorsiklo sa paglabang sa dalan sa sitio Bagalnga, barangay Flores, lungsod sa Catmon nga miangol usab sa 74-anyos nga lalaki nga sakay niini.
Si PO1 Vercelito Debalosan sa Catmon Police Station miila sa biktima nga si Jomel Colosco Aresam, 14-anyos ug ang nakadasmag mao si Alfredo Luage Jurado, 74-anyos nga pulos nagpuyo sa maong dapit.
Matud ni Debalosan nga padulong pauli sa ilang panimalay si Jurado dihang nahitabo ang aksidente.
Dugang ni Debalosan nga ang biktima nakabaton og mga bun-og sa kalawasan samtang si Jurado nga nawad-an sa iyang pagpanimbang nalamba usab sa karsada nga maoy nakaingon sa mga bun-og sa iyang lawas.
Unang gihatud ang duha ka angol sa Dosado Memorial Hospital sa lungsod sa Sogod apan gibalhin sa Gullas Hospital sa Banilad, dakbayan sa Mandaue alang sa dugang pag-atiman sa mga doktor. (BANAT NEWS)
- Latest
