PRO-7 gipasidunggan sa Crame

CEBU, Philippines – Gihatagan og pasidungog ang kapolisan sa Rehiyon-7 tungod sa pag-una sa kampanya batok sa ilegal nga drugas ug pagsakmit sa mga armas nga wala’y lisensya.

Niadtong Agosto 22, ang buhatan sa Deputy Chief PNP for Administration mipadangat og mensahe sa Police Regional Office-7 tungod sa kampanya niini batok sa ilegal nga drugas.

Si PNP Deputy Director General Filipe Rojas Jr., mismo ang mipadangat sa maong komendasyon sa PRO-7.

Gikan sa Hunyo 6 hangtud Agosto 10, ang kapolisan sa Central Visayas nag-una sa kampanya batok sa ilegal nga drugas sa nasud tungod sa pagkasakmit sa kapin sa dos mil ka gramos nga shabu sa ilegal nga drugas.

Samtang ikaduha ang PRO-7 sa pagsakmit sa 127 ka armas nga wala’y lisensya.

Matud sa maong komendasyon nga ang Regional Director sa PRO-7, Chief Supt. Prudencio “Tom” Bañas, nakahatag og commitment ug professionalism ug ang paghatag niini og dedikasyon sa iyang trabaho. Sulod lang sa duha ka buwan kapin na sa P53 milyones ang kantidad sa drugas nga nasakmit sa kapolisan sa rehiyon. -/GMR) (BANAT NEWS)