Pamilya na lang ang makaangkas sa motor

CEBU, Philippines - Daghan ang misinta sa kasuko pagkasayod nila nga si Senador Vicente “Tito” Sotto Jr. misugyot og balaudnon nga idili na ang pagpaangkas sa motorsiklo sa dili sakop sa pamilya sa drayber o tag-iya sa motor.

Base sa gisugyot nga balaudnon ni Senador Sotto buot niya nga pasilotan ang mga drayber nga mopaangkas og dili sakop sa iyang kabanay aron kuno maalkontrahan ang mga tulisan nga magsakay og motor.

Apan bisan si LTO-7 Regional Director Arnel Tancinco mitataw g’yud nga lisod kaayo kini ipatuman sa hingpit ang mao nga balaod kay gamay ra kaayo ang mga sakop sa LTO.

Ang gusto ni Tancinco mao nga higpitan ang pag-isyu og mga lisensya sa pagmaneho’g sakyanan ngadto sa mga tawo nga kuwang og kahibalo sa mga lagda sa tukma nga pag-drive.

Gawas nga pataka na lang ang pagpangisyu og mga lisensya sa pagmaneho’g sakyanan, daghan pa g’yud nga nagmaneho og mga motor nga walay lisensya.

Ang mga nangasuko ni Senador Sotto miingon nga dili na sila mobotar kaniya kun magpapili kini pag-usab og pwesto sa kagamhanan kay gihulagway nila nga wala kini pagbati sa mga kabus.

Ang mga motorsiklo maoy sakyanan sagad sa mga tawo nga dili makaabot pagbalit og “four-wheel” nga sakyanan.

Si Tancinco nagkanayon nga gusto niya nga higpitan g’yud ang pagpangisyu og lisensya aron kadto ra’ng masinati na gayud sa balaod sa pagmaneho maoy makaangkon og driver’s license. Pagka karon, sayon ra kaayo ang paglukat og lisensya, ilabi na nga adunay mga kawani sa LTO nga masubornohan, ug kun sila may lisensya na, dali ra usab kaayo ang pagpangutang og motorsiklo sa kantidad lang nga P2 mil.  (BANAT NEWS)