Talisay mamalit og dugang garbage trucks
CEBU, Philippines - Ang kagamhanan sa dakbayan sa Talisay namalit og mga garbage trucks nga ipanghatag ngadto sa kabarangayan aron pagsulbad sa problema sa koleksiyon sa basura.
Ang kagamhanan sa Talisay naproblema karon sa pagpangolekta sa mga basura diha sa kabarangayan tungod kay ang mga garbage trucks magsige lang og kaguba.
Ang Talisay dunay 14 ka garbage trucks, duha lang niini ang bag-o apan wala pa usab makadagan tungod kay giproseso pa ang mga rehistro niini.
Niadtong milabay’ng semana tulo lang ka garbage trucks ang nagdagan hinungdan nga dili maato ang pagpangolekta sa mga basura diha sa kabarangayan.
Ang hepe sa Ecological Solid Waste Management nga si Edwin Nierves mibutyag nga ang mga garbage trucks karon sa siyudad mga daan na hinungdang magsige na lang og kaguba.
Subay niini, si Talisay City Administrator John Yre De los Reyes nagkanayon nga ang siyudad namalit og lima ka garbage truck ug giproseso na ang mga dokumento niini ug posibleng karong semanaha ma-deliver na sa Talisay.
Matud ni De los Reyes nga ang maong mga garbage truck iapud-apod ngadto sa kabarangayan sa siyudad.
Gibutyag ni De los Reyes nga dugangan pa unya og pamalit sa siyudad og laing mga garbage trucks aron maapod ang 22 ka barangay sa Talisay. (BANAT NEWS)
- Latest
