Babayeng pusher sikop
CEBU, Philippines - Nasikop sa mga sakop sa City Anti-Illegal Drugs Special Operation Task Group (CAIDSOTG) ang usa ka ginang nga gi-dudahang “level two” drug pusher pasado alas 10 niaging gabii sa sitio Maharlika, Sambag II, dakbayan sa Sugbo.
Ang nasikop naila nga si Funny Delos Reyes Montebon, 50, molupyo sa nahisgutang lugar.
Matud sa hepe sa CAIDSOTG, Senior Insp. Eunil Avergonzado, nga ang maong babaye maka-dispatsar og kapin sa 200 gramos nga shabu matag semana.
Mga sakop sa CAIDSOTG ang nakigsabot sa suspetsado aron mobaligya kanila og usa ka paketeng shabu.
Human gibaligyaan gyud sa suspetsado ang mga polis, daling gisikop sa kapolisan si Montebon.
Dihang girekisa ang suspetsado nakuhaan pa gyud og dugang duha ka pakete nga shabu.
Matud ni Avergonzado nga ang maong operasyon nahitabo gumikan sa mga taho sa mga silingan sa suspetsado kalabot sa iyang kalihukan.
Ang suspetsado mihimakak sa maong taho ug miingon nga nagduwa ra siya og mahjong dihang gidakop siya sa mga polis. (BANAT NEWS)
- Latest
