Lalaki nadasmagan og bus kritikal

CEBU, Philippines - Kritikal ang kahimtang sa usa ka wala pa mailhing lalaki nga gituohang may deperensiya sa pangisip human dasmagi sa usa ka bus de pasaheroan sa Giwang, lungsod sa Alcoy sa niaging gabii.

Gihulagway sa kapolisan ang maong lalaki nga nagsul-ob og dirty white nga t-shirt, taas og buhok, may gitas-on nga 5’2” ngadto sa 5’5”.

Samtang ang drayber sa bus nga nakadasmag naila nga si Roger Bara, 45, taga Balisong, Argao.

Sumala pa ni PO2 Erlan Alonoy, desk officer, nga pasado alas 8:00 sa miaging gabii nagbarug ang biktima sa kilid sa dalan dihang nadasmagan sa bus nga padulong sa Bato, Samboan.

Matud ni Alonoy nga hinay lang ang dagan sa bus apan kalit nilabang ang biktima.

Misuway pa unta paglikay ang bus apan wala madayon tungod kay may gikasugat nga sakyanan hinungdan nga napunggit ang biktima sa atubangan nga bahin sa bus. Gidala ang biktima sa Dalaguete District Hospital apan tungod sa grabeng kadaut sa iyang lawas, gibalhin kini sa tambalanan sa dakbayan sa Sugbo.

Kasamtangang gitanggong sa kapolisan sa lungsod sa Alcoy ang drayber sa bus samtang nagpaabot kung may kaliwat ba ang biktima nga mopatim-aw.  (BANAT NEWS)