Tulo ka acacia sa Naga putol na
CEBU, Philippines - Nahuman na pagputol ang tulo sa pito ka gabok na nga punoan sa acacia sa daplin sa national highway sa dakbayan sa Naga niadtong Huwebes.
Matud ni Naga City Mayor Valdemar Chiong nga kagahapon sa gabii gikatakdang sugdan usab sa Department of Public Works and Highways (DPWH)-7 ang pagputol sa laing punoan sa Acacia.
Gikatakdang sulod karong semanaha mahuman na og putol ang tanang mga putlonon nga mga punoan sa Acacia sa maong lugar.
Ang mga Acacia nga putlonon nahimutang sa daplin sa karsada sa barangay Tinaan, Inuburan ug Langtad.
Matud sa mayor nga ang maong mga punoan sa acacia nagpanuigon na og kapin sa 100 ka tuig.
Ang kagamhanan sa dakbayan sa Naga gikatakdang magtanum og laing mga kahoy puli sa mga gipangputol sama sa Narra.
Ang Naga adunay 30 ka punoan sa acacia nga nahimutang daplin sa karsada.
Ang mga pinutol nga punoan sa acacia gidala sa buhatan sa Department of Environment and Natural Resources (DENR)-7. (BANAT NEWS)
- Latest
