Babaye giluba patay sa uyab

CEBU, Philippines - Patay ang usa ka babaye human giunay og dunggab sa makadaghang higayon sa iyang hinigugma samtang sila nangatulog sa Sitio San Miguel Barangay Apas, siyudad sa Sugbo kagahapon sa kaadlawon.

Ang biktima giila nga si Kate Montecillo, residente sa siyudad sa Talisay samtang ang suspek mao si Johnrey Soledad, 23, hinigugma sa biktima ug residente sa Barangay Apas.

Base sa impormasyon sa kapulisan ang biktima maghigdaan usahay sa panimalay sa suspek.

Sa inisyal nga imbestigasyon nasuta nga sa wala pa nahitabo ang krimen ang biktima ug suspek nagtupad sa pagpangatulog sa kwarto sa lalake.

Apan ang amahan sa suspek nga si Rodrigo Soledad ug laing kabanay niini giingong kalit lang nakadungog sa mga siyagit ug mga paglagubo sa taas hinungdan nga ilaha kining gisaka.

Pag-abot sa taas sa amahan sa suspek iyang nakita ang iyang anak nga nagkupot pa og kutsilyo nga dunay dugo ug ang biktima nga wala nay kinabuhi ug napuno ang lawas sa samad-dinunggaban.

Si SPO4 Alex Dacua sa Homicide Section sa Cebu City Police Office mibutyag sa ilang nakuha nga impormasyon sa amahan sa suspek giingon si Soledad dunay “nervous breakdown.”

Gidugang ni Dacua nga base sa mga samad nga nakita sa lawas sa biktima giingong dunay dako nga kasuko ang suspek ngadto kang Montecillo hinungdan nga iyaha kining napatay.

Sa pagresponde sa kapulisan sa crime scene nakuha nila ang drug paraphernalia ug usa ka gamay’ng pakete sa shabu nga nagamit lakip na usab ang kutsilyo nga gigamit sa suspek sa pagdunggab.

Nagtuo ang kapulisan nga posibleng tiggamitan og ginadilng drugas ang suspek. Suway pa unta nga gitabang sa AFP medical team ang biktima apan nakabsan g’yud kini sa iyang kinabuhi.

Samtang ang suspek gidala karon sa tambalanan human makaangkon usab og samad hinoon di kasulti ang kapulisan kun suway usab kining midunggab sa iyang kaugalingon.  (BANAT NEWS)