Bus nabangga sa balay 14 naangol

CEBU, Philippines - Katorse ka tawo ang naangol dihang nabangga sa usa ka balay ang gisakyan nilang Ceres bus nga milikay sa motorsiklo nga sugat niini sa iyang lane diha sa Barangay Poblacion, Lungsod sa Sogod niadtong Huwebes sa hapon nga miangol og 14 ka mga pasahero.

Matud sa hepe sa Sogod Police Station Police Insp. Romeo Caacoy, ang bus gikan sa siyudad sa Sugbo ug paingon unta sa lungsod sa Tuburan dihang pag-abot sa Barangay Poblacion giingong usa ka motorsiklo ang misulod sa iyang linya hinungdan iyaha kining gilikayan.

Apan sa paglikay sa bus mibangga kini sa usa ka panimalay nga miresulta sa pagkaangol sa mga sakay nga pasahero.

Tungod sa maong hitabo ang Land Transportation Franchising and Regulatory Board (LTFRB-7) miingon nga mo-isyu sila og show cause order sa Vallacar transit.

Si LTFRB-7 director Ahmed Cuizon miingon nga nakig-alayon sila sa hingtungdang kompanya aron usab nga maatiman ug mahatagan og assistance ang mga biktima.

Gimanduan ang Vallacar Transit nga mopatim-aw sa ilang buhatan alang sa usa ka hearing aron makahatag sa ilang rason kun nganong dili sila angay suspensuhon ug kanselahon ang ilang prangkisa.

Ang mga biktima daling gidala sa Juan Dosado Memorial Hospital samtang ang driver sa bus nga si Juniefer Coraraton gi-detain sa Sogod Police Station ug posibleng mag-atubang og kasong reckless imprudence resulting to physical injuries and damage to property. (/EIM)(BANAT NEWS)