Duha nangawat motorsiklo sikop

CEBU, Philippines - Duha ka suspetsadong carnappers ang nasikop sa kapolisan samtang usa kanila ang nasikop sa iyang biktima sa dakbayan sa Talisay. Niadtong Sabado sa hapon, nasikop si Arcel Magalang, 21-anyos, taga Bacay, Minglanilla, sa follow-up operation nilang SPO1 Mikie Espina, SPO1 Yvonne Illustrisimo, PO2 Jude Enemecio ug PO1 Stephen Sefuesca sa Barangay Tanke, Talisay.

Ang kauban ni Magalang nga si Junnel Obiso, hingkod, taga Tulay, Minglanilla, ang nakasibat ug padayon kining gipangita sa mga polis.

Ang biktima nga si Vincent Caballos, 29, taga Barangay Maghaway, ang misumbong sa kapolisan human giingong gidagit sa mga suspetsado ang iyang motorsiklo sa Sitio Sangi, Tabunok, dakbayan sa Talisay niadtong Biyernes sa gabii.

Nabawi gikan sa suspetsado ang usa ka yunit nga Honda XRM nga nagtangag sa plakang 1423-GS nga nagkantidad og P50,000 ug usa ka tambutso.

Samtang usa ka Sherwin Sanchez Guillen, 30, taga Ramona Village, Dumlog, Talisay ang nasikop ni Jeffrey Escultor Villaber, 24, taga Sitio Cabancalan-1, Bulacao, Pardo, dakbayan sa Sugbo.

Si Guillen giingong armado og kutsilyo nga gition kang Villaber dayun dagit sa motorsiklo.

Ang biktima nangayo og panabang sa mga polis kinsa niadtong higayona nagpatrolya hinungdan nga naapsan ang suspetsdado ug daling gisignit ni Villaber.

Ang dinakpan gitugyan ngadto sa Mobile Patrol sa dakbayan sa Talisay nga pinaagi nilang PO2 Arthur Santillan ug PO1 Ramonito Dinapo.

Nabawi gikan sa posisyon sa suspetsado ang usa ka unit nga SYM nga motorsiklo nga kolor puwa nga nagtangag og temporaryong plaka nga 113108 ug ang kutsilyo nga giingong gition niini sa biktima nga dunay gitas-on nga 12-pulgada.

Ang kapolisan sa Talisay nisusi karon sa background sa duha ka suspetsado kung wala ba malambigit og lain pang insidente sa carnapping.  (BANAT NEWS)