Talisay mangayo og dugang polis

CEBU, Philippines - Mangayo og dugang polis ang kagamhanan sa dakbayan sa Talisay sa Cebu Provincial Police Office.

Gipadayag ni Konsehal Danny Caballero, vice-chairman sa City Peace and Order Council ug chairman sa committee on peace and order sa konseho sa siyudad, nga kuwang ang polis sa Talisay nga karon anaa lang sa 78 kabuok.

Base sa talaan sa National Statistic Office (NSO) sa tuig 2010 mikabat ngadto sa 200,772 ang gidaghanon sa populasyon sa Talisay.

Matud ni Caballero nga kung madugangan ang gidaghanon sa polis sa siyudad posibleng mohinay ang krimen.

Nasuta nga usa sa taas nga krimen sa siyudad mao ang theft o pagpangawat nga niabot sa 78, 28 ang robbery ug 11 ang physical injury gikan Enero hangtud Abril niining tuiga.

Si Caballero mohangyo sa CPPO pinaagi sa hepe nga si Senior Supt. Noel Gillamac, nga hatagan og dugang 50 ka polis ang Talisay.

Nunot niini, ang hepe sa kapolisan sa Talisay nga si Supt. Reycel Carmelo Dayon nagkanayon nga ang kakuwang sa personnel nakita sa mga opisyal sa siyudad dihang mipresentar siya og briefing atol sa gipahigayong meeting sa peace and order council niadtong milabay’ng semana.

Apan matud ni Dayon nga posibleng mahatagan ang siyudad og dugang police personnel apan dili matuman ang gidaghanon nga pangayoon ni Caballero tungod kay dili lang ang Talisay ang adunay problema sa ka kuwang og mga personnel.

Mapasalamaton si Dayon sa tanang suporta nga gihatag sa siyudad ngadto kanila sama sa pag-abaga sa gasolina sa mga sakyanan sa kapolisan ug paghatag og duha ka Innova patrol car ug duha ka motorsiklo nga gigamit sa traffic division.

Gawas niini si Mayor Johnny De los Reyes misaad usab nga mohatag pa og dugang mga ekipo nga magamit sa  kapolisan sa ilang mga operasyon. (/GMR)(BANAT NEWS)