Hinabang nadawat na
CEBU, Philippines - Nakadawat og pinansiyal nga hinabang nga tag P5,000 matag usa ang mokabat 900 ka mga manindahay sa merkado publiko sa dakbayan sa Mandaue.
Ang maong mga manindahay nag-okupar sa naguba nga merkado publiko sa sitio Tribunal, Centro, dakbayan sa Mandaue gumikan sa linog sa niaging tuig.
Matud sa market administrator, Mosuline Suliva, nga natigayon ang paghatag sa maong hinabang pinaagi sa giaprobahan nga resolusyon sa konseho nga gipangamahanan ni Konsehal Jimmy Lumapas, chairman sa committee on market.
Dugang pa ni Suliva nga nalangan ang paghatag sa hinabang tungod sa pag-andam sa mga rekisito ug pagpangita usab og pundong salapi alang niini.
Gitataw niya nga ang mga manindahay nga wala na makabalik sa naguba nga merkado publiko kasamtangan karong gipahimutang sa gawas nga bahin pinaagi sa gitukod nga mga payagpayag.
Gipasabot niya nga anam-anam lang ang paghatag sa hinabang tungod kay giagad man kung kinsa ang makaandam sa mga dokumento.
Si Suliva miingon nga daghan na ang nakadawat sa nangaging semana ug hayan nga mahingpit na ang tanan nga makadawat sa mosunod nga mga semana. (BANAT NEWS)
- Latest
