Ayuman malaumon luna iya sa Kapitolyo
CEBU, Philippines - Malaumon si Barangay Kapitan Ramil Ayuman nga ang Kapitolyo gyud ang tag-iya sa luna diin 157 ka balay sa San Miguel, Apas, dakbayan sa Sugbo ang gidemolis.
Matud ni Ayuman nga niduso na sila og petisyon nga nagkwestiyon kun giunsa ni Santiago Suico ug iyang asawa nga nabalhin man ang lots 942 ug 947 ngadto nila.
Usa ka Deed of Exchange sa tuig 1957 ang nakuha gikan sa Court of First Instance nga usa sa gibasehan sa pangangkon nga ang lalawigan sa Sugbo ang tag-iya sa luna. Sa archive sa Kapitolyo, wala nabutang nga adunay Deed of Exchange hinungdan nga nagtoo si Ayuman nga kini malisyoso.
Nanghinaut si Ayuman nga makombinsir si Provincial Attorney Orvi Ortega nga ang luna iya gyud sa Kapitolyo.
Matud ni Ayuman nga sa higayun nga mapamatud-an ang ilang pangangkon, pabalikon ang mga gipapahawa nga mga molupyo sa maong dapit. (BANAT NEWS)
- Latest
