Squatters problema sa Taboan Market

CEBU, Philippines - “Kung adunay problema sa  basura. Kini nga problema kung sagbot lang ug hugaw ang atong limpyohan napa g’yuy mahabilin. Dapat ang namuyo g’yud ang limpyohan.”

Kini ang pamahayag ni Cenon Bacus, presidente sa United Vendors Taboan Market Incorporated sa dakbayan sa Sugbo.

Giisip nga dakung babag alang sa pagpalambo sa Taboan Market ang mga iskwater duol sa merkado.

Nakahatag og dugang problema mao ang basura ug mga bata nga magpakilimos.

Ang tindera sa buwad nga si Ate Percy misaysay nga daghan makililimos ang mosulod sa merkado nga makahasol sa mga mamalitay ug ang uban mangubit sa ilang mga tinda nga buwad. Ang maong kahimtang nakaapekto sa dagan sa ilang negosyo kay magpanagana na ang mga mamalitay sa pagpalit sa ilang mga tinda.

Gisugyot ni Bacus, kinsa kanhi barangay kapitan sa lugar, nga angayang limpyohan sa tanang iskwater duol sa merkado.

Apan iyang giklaro nga dili pagpanaway ang iyang gibuhat kun dili pagpamadlong lamang para maseguro ang kalimpyo sa tugkaran sa Taboan.

Adunay plano ang kagamhanan sa dakbayan sa Sugbo nga tukuran og Senior Citizens Park ang Taboan apan matud ni Bacus nga mas modaku ang problema nga mahiaguman tungod kay posibli nga ang mga iskwater adto na mamuyo sa himoon nga plaza. Nanghangyo ngadto sa pribadong sektor si Bacus nga tabangan unta ang mga iskwater nga mahatagan og tarong nga pinuy-anan.

Laing sugyot ni Bacus ngadto sa gobyerno nga unta pun-an nila ang rota nga moagi sa Taboan Market aron mapun-an sad ang mga kostumer sa mga tindera.

Samtang ang market supervisor sa Taboan nga si Agustin Caballero uyon sa sugyot ni Bacus nga angay’ng aksiyonan sa gobyerno ang nagkadaghang iskwater duol sa tindahan aron hingpit na ang kahapsay ug kalimpyo niini.

Usa ka pulong-pulong ang gitakda sa mga vendors mahitungod sa maong isyu sa mga squatters nga nakasamok ug nakaapekto sa ilang negosyo.

Hangyo ni Caballero ug Bacus sa mga molupyo duol sa Taboan ug sa mga tindera nga magtinabangay sa pagpanglimpyo sa palibot aron sa pagseguro sa kalimpyo sa ilang merkado. (BANAT NEWS)