Traysikol, poste gidumbol sa Koryanang hubog

CEBU, Philippines - Gibalhug sa detention cell sa kapolisan sa dakbayan sa Lapu-Lapu ang usa ka Koryana gumikan sa daghang kadaut nga namugna sa iyang pagmaneho nga hubog.

Ang gipriso mao si Eunmi Ko, 39, dalaga usa ka Koryana nga kasamtangang nagpuyo sa may dalan A.S Fortuna, dakbayan sa Mandaue.

Si Ko giingong nibangga og traysikol, midaro sa poste sa kuryente ug nahug ang sakyanan niini sa may kimba sa Barangay Agus, dakbayan sa Lapu-Lapu sa milabay’ng gabii.

Base sa pasiunang imbestigasyon sa kapolisan pinaagi ni SPO4 Edgar Sagarino nasayran nga samtang nagmaneho si Jose Torregosa Camacho, 46, sa iyang traysikol, kalit kining gidumbol ni Ko nga luwan sa usa ka Sportage wagon.

Sa suway niining paglikay sa iyang obligasyon ngadto ni Camacho, mipasirit si Ko sa pagpadagan pahilayo sa maong dapit ug pag-abot duol sa usa ka dakung hotel sa Barangay Agus, usa ka poste sa Mactan Electric Company (MECO) ang iyang gidaro.

Kini ang hinungdan nga nawad-an og control si Ko ug nahulog sa kimba nga adunay giladmon nga pito ka tiil.

Hinoon luwas si Ko sa kadaut sa panglawas apan sa pagsusi sa kapolisan walay lisensiya nga gihuptan si Ko ug nasuta sa liquor test nga positibo kini nga ubos sa impluwensiya sa ilimnong makahuhog.

Gumikan niini kasong kalapasan sa pagmanehong walay lisensiya ug ubos sa ilimnong makahubog, damage to property sa traysikol ni Camacho ug ang poste sa MECO ang angayang atubangon ni Ko. (BANAT NEWS)