P314mil nga shabu nasakmit sa LCPO
CEBU, Philippines - Mokabat ngadto sa P314 mil nga kantidad sa gituhuang shabu ang nasakmit sa mga sakop sa City Anti- Illegal Drug Special Operation Task Group sa dakbayan sa Lapu-Lapu gikan sa gipasanginlang level 2 drug pusher sa Sitio Saac , Barangay Buaya kagahapon sa tungang gabii.
Nasikop sa operasyon si Renjen Carillas Casio alyas Ando, kinsa giingong mohalin og 150 gramos ngadto sa 200 gramos nga shabu matag semana.
Matud pa ni Senior Inspector Rogelio Pineda Jr. , nakuha gikan ni Ando ang usa ka bulto nga shabu nga maoy subject sa buy-bust ug pagkasikop ni Casio.
Dugang nakuha kaniya ang lain pang 12 ka bulto nga gituhoang shabu, drug paraphernalia ug cash nga P4 mil.
Matud pa ni Lapu-Lapu City Police Office officer-in charge Senior Superintendent Armando Radoc, duha ka semana na nilang gipanid-an si Ando ilabi na nga naghinangat ang tulo ka adlaw nga street party kay kusog ang halin niini apan pakyas sila pagdakop kaniya nianang mga panahona.
Nasuta sa kapolisan nga si Renjen igsoon ni Real Casio kinsa napatay tulo ka bulan na ang milabay human sa pagronda sa kapolisan sa iyang panimalay.
Samtang si Marjen nga laing igsoon ni Ando nasikop usab sa kapolisan sa milabay’ng bulan human giingong maoy mipuli og pagpamaligya og ilegal nga drugas. Sa pakighinabi kang Ando, hugot kini nga mihimakak nga iya ang mga ebidensiya nga nakuha sa mga operatiba.
Matud pa ni Ando ang mga nakuha nga shabu iya kadto sa iyang maguwang nga si Real Casio ug dili gikan kaniya. Bag-o lang siya sa maong panimalay ug wala siya mamaligya niini. (BANAT NEWS)
- Latest
