Tawo gitoohang nagpusil sa kaugalingon

CEBU, Philippines - Patay na nga nadiskubrehan sulod sa lawak sa iyang panimalay ang usa ka tawo nga gituohang naghikog pinaagi sa pagpusil sa iyang ulo didto sa Sitio Tolibao, Barangay Malingin, dakbayan sa  Bogo.

Ang naghikog mao si Danilo Alarde delos Reyes,  43, ulitawo nga nagpuyo sa maong dapit ug kawani sa usa ka distribution company sa Barangay Lahug, dakbayan sa Sugbo.

Si SPO3 Oswaldo Layson, sakop sa Bogo Police Station, miingon nga ang igsoon sa namatay nga si Emily, 36, maoy unang nakadiskubre sa nagbuy-od nga patay’ng lawas sa iyang igsoon ug mao usab kini ang nangayo’g panabang sa kapolisan.

Matud ni SPO3 Layson nga ang ilang mga imbestigador nakakaplag og 45 kalibre nga pistola sa ibabaw sa patay’ng lawas sa biktima. Ang armas adunay unom ka  bala ug usa ka kabhang. Nakit-an usab ang usa ka slug.

Dugang nga napalgan sa tapad sa patay’ng lawas mao ang cellphone, laptop ug suicide note apan wala hinuon magsulti sa gihambin nga suliran nga maoy hinungdan sa paghikog.

Si SPO3 Layson miingon nga gitug-an ni Emily ngadto sa mga imbestigador nga niadtong Oktubre sa miaging tuig  ang iyang igsoon misulay na usab sa paghikog pinaagi sa pag-inom og hilo sa ilaga apan dali kining nadala sa tambalanan ug naluwas.

Hinuon si Layson miingon nga ilang gisugyot sa mga kabanay sa namatay nga ipaubos sa autopsy ang patay’ng lawas aron pagsuta kun may foul play ba ang kamatayon niini. (BANAT NEWS)